一名住係南卡羅萊納州(South Carolina)嘅準媽媽Reanna Stephens將會係今年四月成為真正嘅媽媽,不過懷孕六個月嘅佢,最近就比人鬧爆,原因係因為佢個肚太平,睇落完全唔似一名孕婦。

Reanna今年18歲,目前已經有六個月嘅身孕,但係因為佢嘅肚實在太平,完全唔似孕婦不特止而且仲比一般人瘦。所以就引來唔少非議,有人就問佢其實係咪講大話呃大肚,又有人問佢係咪有厭食症,更加有人鬧佢話佢會餓食佢肚入面嘅bb咁話。

圖:未懷孕前的Reanna Stephens(圖:Reanna Stephens facebook)

不過佢似乎對呢啲評論相當睇唔過眼,而且佢仲公開作出回應,佢話佢嘅bb同其他人一樣,每個月都會長大,同bb嘅健康根本無關係。佢話佢知道佢同佢嘅bb都係非常健康。除咗言論回應,佢仲公開咁出示bb嘅超聲波做證明。

圖:懷孕初期的Reanna Stephens(圖:Reanna Stephens facebook)

佢回應就話批評嘅人對佢根本認識唔深,佢話其實佢一直都係度堅持緊健康飲食,唔飲汽水唔食糖,而且佢堅持健康嘅素食習慣。除咗飲食之外,佢亦都經常做運動,已經玩咗六年武術嘅佢係懷孕之後一直都有做瑜伽,但係因為懷孕就停咗玩武術。

圖:懷孕5個月的Reanna Stephens(圖:Reanna Stephens facebook)

屋企人就對佢非常支持,而且佢媽媽仲透露,其實當年都同佢一樣,陀住佢果陣一樣個肚都係好平,只係有少少隆起。見佢對自己相當有自信而且生活咁健康,希望四月果時會見到一名健康嘅bb啦!不過如果呢個情況係香港發生都幾唔方便,呢位準媽媽隨時坐關愛座都會比人鬧,如果係香港,真係隨時要帶住張超聲波周圍走先得呀!

圖:寶寶超聲波圖