一連26場的黃子華棟篤笑《金盆o浪口》噚晚開騷喇!呢次話晒都係子華神嘅告別作,相信大家都仲記得早排粉絲同黃牛大軍搶飛嘅戰況!不過自從子華神宣佈要打擊黃牛,一口氣加開9場,一共15萬張飛公開發售之後,唔少黃牛都有得震冇得瞓,臨近開騒,更出現「恐慌性拋售」嘅情況,為求吐現甩身,賣飛嘅藉口層出不窮!突然大量「原價放飛益粉絲」、突然「臨時要返工唔得閒」、突然「俾朋友放飛機」,連「原本買咗飛同女友睇,點知佢派帽」呢啲咁爆趣嘅藉口都出埋,辛苦晒喇各位蟹民!