健力士世界紀錄經常記載唔同嘅世界紀錄,有啲記錄就非常有趣,而同時又有啲紀錄係非常古怪。今日就同大家睇一睇五項非常古怪嘅世界紀錄:

 

1.最長時間唔沖涼(60年):一般城市人一日至少都沖一次涼,兩日無沖涼都幾乎想死。但你地有無諗過如果60年都唔沖涼會點?係伊朗南部有一位老人家哈吉就連續60年無沖涼,因為童年有啲唔好嘅回憶,所以就一人隱居避世,60年無沖涼嘅佢身上好似多咗層野咁,就算有人免費幫佢沖涼佢都會拒絕。要創造呢個紀錄,要有非常堅毅嘅耐力,不過城市人向來乾淨,恐怕就無人敢挑戰喇!因為呢個紀錄仲一直比佢自己刷新緊。

2.一分鐘踢自己個頭134次:係尼泊爾有一位男子叫做Puskar成功創造出一個紀錄,就係用腳係一分鐘踢自己嘅頭134次,平時少做開柔軟運動嘅人可能連踢自己個頭一下都未必做到,但佢講緊平均一秒可以踢多過兩腳,真係非常犀利,只不過好似就無咩實用性喇…..

3.470公斤女子(每天攝取12萬卡路里):美國有一位女子Mayra Rosales因為患病所以增重到470公斤,基本上佢喪失自理能力,但據稱係做完手術之後,佢成功減磅,由接近半噸重減到90公斤,真係瘦身界嘅一大奇蹟。係囉,肥,人地有病都減到,仲有咩藉口呃自己話肥都可以好靚呢?

4.一直在玩命–連續四十日唔訓覺:正常人趕project開p通一晚頂已經感覺到病病地,再通多晚真係隨時命都無。不過係洛杉磯有一位叫做Tyler Shields嘅攝影師,曾經保持968個鐘唔訓覺嘅紀錄,由於呢項紀錄非常危險,所以健力士世界紀錄大全無記載到。所以Tyler就決定自己紀錄落黎。不過,佢係創造呢個紀錄嘅時候曾經發過幾次高燒,差啲命都無。真係學羅莽師父所講:「搵食,唔洗搵命博架!」

5.真正屎尿屁代言人–收集1277種屎:有一位古生物學家George Frandsen自從大學畢業之後,就一直收集糞便化石,加加埋埋超過1277種,真係名符其實嘅屎撈人。不過佢嘅研究的確係有價值,就佢呢一份勇氣已經值得為佢鼓掌。

小編:各式各樣世界紀錄,都係由奇人異士所創造,睇睇而家香港嘅環境,最有機會創造嘅睇黎係最長OT紀錄。