雖然好多富豪都係無咩頭髮,但係對於一般男人黎講,脫髮真係一種惡夢。市面上有好多方法但都唔係100%可以根治到呢個問題,不過最近有日本科學家發現,炸油入面嘅添加物「聚二甲基矽氧烷」原來對毛囊嘅增生係好有效嘅,如果相關嘅研究成功,解決禿頭問題就真係指日可待喇!

(圖片來源:網絡)

根據外媒所報導,為咗解決禿髮問題,唔少科學家都認為植入「毛囊胚」係一個可行嘅方法,但係毛囊胚要用患者嘅幹細胞黎培養,要拎到佢有一定難度,不過近日就有日本科學家發現咗可以快速便利培養毛囊胚嘅方法。

研究人員將毛囊胚值入老鼠體內,證實有效。(圖片來源:newsworks)

日本橫濱國立大學嘅研究團隊最近就係《科學期刊》度發表咗一項研究,指出佢地已經成功利用「聚二甲基矽氧烷(DMPS,dimethylpolysiloxane)」培養出5000個人類毛囊胚,而佢地將呢啲毛囊胚植入實驗老鼠體內,幾日後老鼠真係生到頭髮出黎。

日本科學家發現,炸油添加物「聚二甲基矽氧烷」對於毛囊嘅增生係好有效。(示意圖,圖片來源:中時電子報)

不過呢樣好似好神奇嘅聚二甲基矽氧烷其實好常見,例如係快餐店入面,聚二甲基矽氧烷經常比人用黎加落炸油入面,可以避免啲油起泡。睇到呢度,有唔少朋友可能而家已經直接想跑落M記隊返幾打薯條。不過,雖然係油入面有呢種物質,但係直接食落肚係無效架,所以炸薯條都係唔好食咁多。

負責領導研究團隊嘅組織工程學教授福田淳二就指出,雖然係研究入面嘅實驗對象係老鼠,但根據佢地嘅研究結果,用落人度都有好大機會有咁嘅效果,如果將來可以大量生產,呢樣技術就可以成為解決禿髮問題嘅最佳辦法。