今日小編非常罕有地同大家分享一啲歷史冷知識(罕有….)。相信咁多位朋友都會睇過啲古裝劇係有打仗攻城嘅一幕。成日都會見到攻城嘅士兵會搭住梯去攻城,睇到呢幕好多人都會諗,點解守城果班友唔直接推跌道梯,要等佢地爬上黎果時一個一個斬咁傻豬?其實呢啲唔係古裝劇嘅bug黎架!係古時打仗真係唔會推道梯,原因原來有2個。

 

第一,因為攻城梯嘅設計係好難推得郁架。一般黎講攻城嘅梯子都會有個鈎,只要放到上去就好難推得郁。而且攻城梯係有架車裝住(如下圖),而且攻城梯本身係好重,玩下手想推隨時守城果個都跌埋落街命都無。

 

第二,對於守城人黎講,因為佢地有武器克制呢種攻城梯,所以推唔推都無分別。守城人有一種武器叫做弓弩,係守城嘅必備良藥。呢種弩射出黎嘅箭好似木杆,用鐵片做尾翼。呢種武器用係守城度威力無窮,明朝有一位名將戚繼光就對呢種武器進行過記載。話呢種武器發射嘅時候,好似暴雨咁,攻城嘅人根本走都走唔甩,仲洗咩曬心機推梯,根本就黎幾多死幾多(如下圖)。下次如果同朋友睇劇嘅時候佢咁問,不妨拋下書包同佢解釋下。