100毛琴日正式上市,收市報6個幾,市值直升17億幾….而2年多前ViuTV 節目《跟住矛盾去旅行》蔣麗芸曾經爆出: 「你嗰本咁嘅雜誌仔(《100毛》)就釘啦!睇佢捱到幾耐,威到咁喎真係。」

當日腦細話蔣麗芸講得好啱:「難得尊貴議員洞悉傳媒行業現況,知道經營環境困難,我哋本雜誌仔隨時釘,係絕對唔出奇嘅事。鏡頭前彬彬有禮嘅尊貴議員,喺鏡頭後(佢以為喺鏡頭後)稍有失儀口出預言,係人之常情,佢冇做錯到,我哋選民係會繼續支持。」仲話唔驚得罪蔣麗芸會影響公司生意,因為成班拍檔、同事都有共同理念,睬佢都傻。

回頭一望兩年後今日,毛記市值甚至超越蔣氏家族嘅震雄集團,集團收市報兩個幾,市值僅有14億多。雖然唔知100毛可以高企幾耐,但都算係3個後生仔用腦力同努力爭番啖氣既典範!
而根據蘋果日報報導蔣議員更聲稱 「今日大家不斷回帶,話佢曾經笑過100毛本「雜誌仔」就嚟「釘」,佢就相信100毛係經過佢嘅激勵,於是轉型做廣告,跟住先有今日嘅成績,所以佢都好替100毛開心,並且提醒林日曦要好好地對啲股民,同埋記住每年都要派息喎。」