有D人寧願係咁send語音訊息都唔肯直接打電話,原來咁可能會患上「電話恐懼症」、「電話焦慮症」!

根據心理學家Guy Fielding喺1990年代嘅研究,10%-15%嘅成年人有「電話焦慮」(telephone apprehension),當中嘅2.5%更加係有「電話恐懼症」(telephone phobia),咁點先算係有電話恐懼呢?

1.唔鍾意聽電話
2.無必要唔想人地打畀你,就算有事都儘量唔好打
3.遇到真係要接嘅電話,會忐忑不安,有時候會特登唔聽,然後send 訊息話自己好忙,請用message溝通
4.任何時候,電話都係處於靜音狀態,聽到鈴聲會好緊張
5.講完電話,好驚聽到對方cut線嘅聲,所以有理無理一定cut線先
6.見到陌生嘅號碼會唔敢接,有miss call都唔會打返轉頭

有以上症狀嘅人有好大機會患上「電話恐懼症」,雖然佢唔係D咩好正統嘅精神病,但喺宜家呢個時代真係越黎越多人會有呢D情況需要正視,再嚴重D隨時會演變成社交障礙。會出現呢D症狀,主要係因為幾個原因:

1.通話時資訊過少
講電話嘅時候只能夠聽到聲音,究竟對方當時做緊咩、喺咩表情同心境下同你溝通,你無從得知,加上喺實時間嘅通話期間,難免會出現dead air嘅情況,唔少人都好驚面對幾秒間嘅空白,喺呢個太多未知數嘅情況下所有嘢自己無法控制,從而產生莫名嘅恐慌

2.心理創傷
恐慌嘅產生源於過往無法承受嘅經歷,如果曾經喺通話過程中經歷不愉快事件:例如喺電話被分手、收到噩耗、打緊電話發生意外等等,都會令用家產生焦慮同排斥。

3.覺得被侵犯私隱
Send訊息同講電話最大嘅差異,就係你可以喺想睇嘅時候先睇同回覆訊息,但電話被動性高好多。加上講電話需要即時回應,但訊息你可以分析一段時間先諗一個你覺得最好嘅內容回覆,所有嘢喺自己掌控之中,亦都可以根據一個人嘅訊息習慣而睇到對方嘅背景,相反講電話嘅時候有D人完全唔可以兼顧其他野,會令自己手忙腳亂,咁樣佢哋就會覺得好似生活被打擾,而且自己都未有心理準備去應對電話嘅另一方。

4.性別差異
呢個原因其實好純粹,喺大部分嘅情況下,女仔比男仔更樂於接聽電話,可能同基因上黎講,女性社交能力同對話技巧普遍比男士好,要聽電話都比較不厭惡,當然都有好多例外例子。

5.保持距離
有D人覺得講電話係一種關係進展嘅代表,例如情侶會傾電話,或者同家人之間都會直接講電話,所以聽電話呢個行為變咗一種關係嘅肯定,所以對於唔太熟悉同埋陌生人,呢D人都會選擇唔接電話。

真係覺得自己有「電話恐懼症」點算好?
其實呢個都唔係一個好嚴重嘅問題,大家又唔需要太擔心,想正視問題以都有幾個簡單嘅方法~首先你要了解自己怕電話嘅原因,繼而對症下藥,究竟係創傷定係純粹怕被打亂行程?你要同自己講唔係每一通電話都係咁值得恐懼,如果怕被突然cut線,可以嘗試下同對方講清楚,畀一個明確結束通話嘅位,有心理準備之下,就唔會產生不必要嘅焦慮。

最後可以學習一下「系統減敏感法」,透過調整呼吸黎舒緩自己嘅緊張咁,聽電話之前先做幾下深而慢嘅呼吸再接聽,咁樣就會無咁焦慮㗎啦~如果你覺得你嘅情況比以上更嚴重,咁你可能要尋求專業心理醫生嘅幫助喇。