當 Celine Dion 唱唱吓一首好似《 鐵達尼號 》主題曲風格嘅新歌《 Ashes 》,死侍突然亂入,原來唔係惡搞,Celine Dion 真係為《 死侍 2 》獻唱主題曲,仲拍埋 MV 添!其實 Ryan Reynolds 早於一個月前,著住一身粉紅色死侍制服為慈善籌款宣傳嘅時候,就喺社交媒體上透露「死侍唔係中意粉紅色,而係中意 Celine」,暗示佢哋呢兩位嚟自加拿大嘅明星首次合作!


當大家陶醉於Celine嘅動人聲線之際,MV結尾才是戲肉,兩人加戲互寸,Deadpool喺台下先大讚Celine嘅演出,但佢接住就話:「依家係《Deadpool 2》唔係《Titanic》!」原來Celine都好有喜劇細胞,仲叫Deadpool做同樣係紅噹噹嘅蜘蛛俠,而主角賴恩雷諾士都隨即在IG轉載呢個抵死MV。

另外賴恩亦於IG貼出片中嘅舞蹈替身,佢講笑話自己拔走8條骨都跳唔出呢隻舞,仲大讚Yanis Marshall表現出色,叫大家多多支持佢。

由賴恩雷諾士(Ryan Reynolds)主演嘅《死侍2》(Deadpool 2)本月中於各地陸續上映,香港定為三級電影,已定5月15日星期二起上映夜場。
今次《死侍2》加入不少新角色,又係一貫抵死作風,有別其他超級英雄電影,就連宣傳都十分破格,鑊鑊都令影迷帶來無限驚喜。