早前有市民於觀塘巧明街返工途中,見到一名穿水靴的四眼叔撳住個女人喺地,個女人不斷掙扎,大叫大嚷,有途人上前了解,被按地的女子大聲說:「佢(男子)話我偷嘢呀!我要驗傷呀、拉埋佢呀、呢條友。」然後不斷以粗口狂駡該名四眼叔。

按爭吵內容,應是有人穿櫃筒底被識穿,從而引發爭執。該名市民認出兩人都是附近一間工廈樓上食堂的職員。一名男途人經過見到二人糾纏,報警求助,並對該名遭撳地的女子說:「打咗3條9啦,你唔使掙扎啦,有差佬嚟。」女子不斷大嗌「驗傷呀! 拉埋佢呢條x街!」兩男女拉鋸近數分鐘,四眼叔終於放手,女子一度坐起身,大駡四眼叔「不知所謂」,跟住又再瞓地用手機反拍四眼叔,更向途人說「佢(四眼叔)話我偷嘢呀…」又叫途人「你哋證明係佢推跌我呀。」有途人即說:「我見唔到呀!」

女事主情緒激動,仲用手機反拍拍攝她的途人。她其後又再指駡四眼叔「佢教人偷錢,拉佢上差館,唔好幫襯呢間公司!」另一方面,四眼叔未有開腔還擊,只顧行埋一邊不斷打電話,相當冷靜。

警方則表示,上周六(11號)一名51歲男途人行經巧明街118號對開,見到街頭有一男一女爭執,其間男子報稱女子偷竊,該名途人遂報警求助,但警員到場,找不到該對爭執男女,列糾紛事件處理。

《蘋果》記者到涉事男女工作的食堂採訪。該食堂老闆指他今個月1號才接手經營,四眼叔是水吧職員,女是收銀員,「上一手佢已經係度做收銀,頂手後畀佢喺度繼續做」,結果他發現有人精神有異。該名女收銀員經常駡人,滿口粗言穢語,又曾經試過「唔見錢」,最近連收銀機亦被整爛,雖然不敢肯定誰人做,但決定解僱該名女收銀員。當老闆通知女收銀員要將她解僱,她即發癲狂駡人,「佢指住水吧師傅係咁鬧,又踢爛門外的菜牌,水吧師傅唔忿氣,見佢又整爛啲嘢,就追咗出去撳住佢。」

勞資糾紛時有發生,但要請個合適嘅人真係唔容易。麻煩起上嚟更加係得不償失⋯