44歲嘅台灣女藝人賈靜雯同細佢9年嘅型男修杰楷喺2015年登記結婚,婚後生咗「咘咘」同「bo妞」,但係一直都未聽聞舉行婚禮嘅日子,直到今年8月,終於有傳11月將會喺峇里補辦婚禮,事後賈靜雯只係笑笑口話:「謝謝大家這麼關心我們的婚禮。」甚至喺之後出席嘅活動,佢哋兩個冇正面回答,只係話:「一切都在計劃當中」、「有好消息會跟大家分享」輕輕帶過。

不過紙又點會包得住火,賈靜雯同修杰楷嘅婚禮將會喺周日,即係25日喺峇里舉行,今日台灣傳媒直擊佢哋出發,一家人着住牛仔親子裝、一對準新人戴晒情侶帽,個個心情都好興奮,咘咘全程表現好乖,反而Bo妞好興奮咁指住飛機,賈靜雯就好忙咁幫囡囡影相!除咗佢哋一家四口之外,同行仲有一個貌似賈媽媽同女助理,經過近5小時嘅飛行,喺下晝2時半抵達峇里機場。

之後賈靜雯喺FB貼咗兩張婚紗照,一張係賈靜雯與修杰楷並肩而坐,背景係巴黎鐵塔嘅黑白相,另一張係喺田野側身背住鏡頭手拖手嘅相,佢仲留言話:「這一站,我們選擇在巴黎拍下了我們心中最期待美好的瞬間~在那一刻留下的,其實都是我們甜甜滿滿的回憶⋯曾說過~我們要時刻努力創造美好記憶!巴黎做到了~下一站會是⋯⋯⋯」

(資料來源:網上截圖/連結)