事緣:
大J幫佢阿哥間舖宣傳,有網民話佢阿哥好有錢、好多靚車、曾經講過反對暴力嘅言論、post過李嘉誠反暴力廣告、係藍轉黃/藍扮黃、喺大陸有生意、食人血饅頭、另一個阿哥(唔係舖主)個外父係藍

facebook post:

請懲罰我。6月開始到而家,我都無嘗試過利用自己既人氣去幫我屋企人,因爲我覺得咁做好自私,要幫都幫左出面既手足先。但係最近因爲生意實在太差……

Jason – 大Jさんの投稿 2019年12月15日日曜日

 

大J之後都有再出一個post澄清:

琴晚我post我二哥間點心店,係我主動提出話要幫佢,佢無叫過我幫手。我問過佢好多次點解唔比我幫手,佢既答案係「怕有藍絲搞事」。有黃店比人搞唔係新鮮事,我唔係話我二哥間舖係黃,但我一講好多人都會覺得係黃,特別係經我口講完,就更加容易成爲藍…

Jason – 大Jさんの投稿 2019年12月15日日曜日

 

黃色經濟圈絕對係好事、可以壯大同路人聲勢、經濟上支援手足、絕對要大力推動,但要慎防跌入幾個方向,唔好變共產黨文革批鬥:

1. 成份論、出身論、根正苗紅論:

文革嗰陣就係要查曬你成份出身、祖宗十八代、遠方親戚,話因為你阿爺係地主、你外父個姨仔個三叔公係國民黨,所以都要批鬥埋你,話你成份不良、出身唔係根正苗紅

而家店主個細佬個老婆個老豆係藍,根本關係遠到分分鐘見都未見過,咁都要批鬥?

2. 誅心論、思想審查:

梁天琦答選舉主任問佢而家支唔支持港獨,梁天琦話明係No, 選舉主任都要話佢心嗰句係YES, 好似思想警察咁審查你。

而家如果店主明明話自己係黃,你都要話佢心入面嗰句係藍,咁樣未免有少少誅心論。正如蕭生都曾經講過,青幫有個規條係「許充不許賴」,寧願你扮自己係青幫人,都唔好明明你係青幫人都唔肯認自己係,咁先可以壯大幫會人數,壯大聲勢。除非好似揚明咁有實質證據支持佢去到今時今日仲撐警,否則無謂誅心,就算佢要扮就由得佢扮,咁樣黃色經濟圈先會越嚟越多人加入,聲勢先會越嚟越大。

3. 翻舊帳、剝奪政治權利終身:

又用返DQ天琦做例子,DQ主任睇番曬以前你FB、IG紀錄,只要你以前講過D佢睇唔順眼嘅嘢,就剝奪你政治權利終身。而家又係諗住翻舊帳、睇番曬以前IG講過咩,以前講過反暴力,就諗住終身剝奪佢棄暗投明嘅權利,就算以前真係藍,而家唔比人由藍轉黃、話人轉得太遲,咁樣自己友人數點會越嚟越多?

4. 仇富、批鬥地主

人地有林寶堅尼就代表一定唔可以係黃?有錢就要批鬥?反而應該團結更多有錢佬企喺我地呢邊,壯大聲勢、提高議價能力

5. 人血饅頭論:

黃色經濟圈唔係黃色義工圈、必須以賺錢為其中一個目標先可以繼續營運落去,甚至不斷壯大,一定要打破人血饅頭呢個道德潔癖

6. 大陸有生意

呢點最大爭議,大J話份約一早簽定,但係個人認為正如杜汶澤講過類似嘅嘢:一路鬧你一路賺到你錢呢點係我本事。只要唔係跪喺度賺錢,而係企喺度賺錢,無背棄良心,就算大陸有生意都唔係問題。事實上大陸有生意都夠膽話自己係黃絲,冒住俾人封殺、無曬大陸生意嘅風險,所謂人血饅頭唔係咁易食